’O ssupierchio
Poesia
di
Achille Serrao
Per Franco Loi
A st’ora ca sciùlia ‘a dint’ô lietto, nu male
‘e pietto…
vi’ ca songo
na vasuliata ‘ntruppecósa nu vico
‘e sfaccimma ‘a matina
e nce mastréa ‘a zoccola
e ciammuórie s’appicciano ‘a matina
‘ntussecùse ‘e sta ggente spatriata
‘mmiez’â campagna, ggente ‘e pane…
Vurria esse ‘e chill’arbere ‘o chiù lluongo
se spanne e sbaréa ‘ncopp’a ll’àsteco
‘ncutenuto isso e ppure casa mia – riggiole e tònaca
a n’ora scippata ô suonno, ‘e malatia
cu lluce ‘ntra ‘o mmurì e nu supiérchio
‘e vita e p’’o suppigno n’aria
che freva d’aria…
na freva doce ca nun stuta
manco nu singo ‘e croce…