‘O cunto d’’e ccose piccerelle
Poesia di
Achille Serrao
‘O cunto d’’e ccose piccerelle
Chiù assaje ‘e ll’at’anno s’arrepecchia ‘a fronna
azzelisce s’abbocca comme vó
Ddio (‘o Ddio ‘e tutte ‘e fronne) stu ddiéce ‘e pataterno
nu poco ‘nzallanuto ‘a cunnuléa
speresce ‘a fronna jetteca – e isso ch’’a cufféa.
Aria pe’ naca, è overo, chisto è ‘o cunto
d’’e ccose piccerelle piccerelle
pure si scasualmente chella fronna
fosse d’’e fronne ll’urdema: che va
truvanno a Cristo ‘int’ê lupine mo’
cu’ ll’aria ‘nfuscatèlla che ‘ntorza
(‘a tene ‘a forza) ‘ncuoll’ê fraveche na nuvula
ddoje nuvule zurfegne quanta nuvule pò (nce prode ‘o naso)
e appiccia ‘o nniro ‘e ll’uocchie
‘ncielo?