‘A neve

Poesia

di

Achille Serrao

‘A neve

‘O tiempo sciùlia
e che se passa arreto nu poco poco
arreto comme si fosse mo’…
n’ata jurnata strèuza
i’ cu’ e nnaserchie fredde
pe’ ‘nnant’ê llastre, janche
tìttule e trezze d’aglio niente struscio
chiù e ‘a sotto n’arrenzà
chi va e chi vene muro muro, ‘a sotto
tantillo ‘e neve, ma na foja cuieta
‘a neve lucente…e sciùlia ‘o tiempo
‘int’â jurnata strèuza appennuliata
a nu rinaccio ‘e nuvule… ma eva
ajére o puramente mo’? i’ sulo
pe’ copp’a sta scalélla ‘e penziére
cu’ ‘a capa agliummaruta…
e ‘a neve se stuta.