La vecchia scortecata

TRATTENEMIENTO DECEMO DE LA IORNATA PRIMMA

Lo Cunto de li Cunti

Giambattista Basile

A cura di

Gianna De Filippis e Salvatore Argenziano

…  E tenenno ‘mano e vasanno chillo dito, che da raspa de chianellaro era deventato ‘mbrunetura de ‘nauratore, commenzaie a dicere: «O arcuccio de le docezze, o repertorio de le gioie, o registro de li privilegie d’Ammore, pe la quale cosa so’ deventato funnaco d’affanno, magazzeno d’angosce, doana de tormiento! è possibele che vuoglie mostrarete cossì ‘ncontenuta e tosta che non t’agge da movere a li lamiente mieie? deh, core mio bello, s’hai mostrato pe lo pertuso la coda, stienne mo sso musso e facimmo na ielatina de contiente! s’hai mostrato lo cannolicchio, o maro de bellezza, mostrame ancora le carnumme, scuopreme ss’uocchie de farcone pellegrino e lassale pascere de sto core! chi sequestra lo tresoro de ssa bella faccie drinto no cacaturo? chi fa fare la quarantana a ssa bella mercanzia drinto a no cafuorchio? chi tene presone la potenzia d’Ammore drinto a sso mantrullo? levate da sso fuosso, scapola da ssa stalla, iesce da sso pertuso sauta, maruzza e dà la mano a Cola e spienneme pe quanto vaglio! sai puro ca songo re e non so’ quarche cetrulo e pozzo fare e sfare. Ma chillo cecato fauzo, figlio de no sciancato e na squaltrina, lo quale have libera autoretate sopra li scettre, vole che io te sia suggeco, e che te cerca pe grazia chello che porria scervecchiarene pe propio arbitrio; e saccio ancora, comme disse Chillo, ca co li carizze, non co le sbraviate, se ‘ndorca Venere».

Chianellaro, ciabattino. –’Mbrunetura, lucidatura. –’Nauratore, doratore. –Arcuccio,
archivio. –Funnaco, fondaco. –’Ncontenuta, ostinata. –Ielatina, gelatina. –Contiente,
contentezze. –Cannolicchio, mollusco bivalve. –Carnumme, uovo di mare. –
Quarantana, quarantena. – Cafuorchio, bugigattolo. –Mantrullo, gabbia per polli. –
Scapola, esci fuori. –Maruzza, lumaca. –Suggeco, soggetto. –Scervecchiarene, portare
via. –Cecato fauzo, Amore, figlio di Venere. –Sbraviate, bravate. –’Ndorca,
addolcisce  ...

Gianna De Filippis e Salvatore Argenziano – La Vecchia scortecata – vesuvioweb 2022