02 – Giovan Battista Basile – Le Muse
Le Muse, di Giovan Battista Basile
Le Muse Napolitane
L’autore stesso dà spiegazioni sul titolo di questa raccolta di egloghe (DE L’AUTORE ’NTUORNO A LI TITOLI DE L’EGROCHE):
“… le Muse so’ figliole de la Mammoria: accossì, conservannose in cheste Egroche una bella :mammoria de l’antichetà de la lengua napolitana no le potea dare nomme chiù a mesura che de le Muse…”
Dalla EGROCA QUARTA MELPOMENE overo LE FONNACHERE
Và, che te faccia fuoco,
che te devente tuosseco e venino,
te ’ntorze ’n canna e no la puezze gliottere,
te la puezze magnare
a ’no lietto perciato,
te faccia male prode,
e male sanetate!
http://www.bibliotecaitaliana.it/xtf/view?docId=bibit001700/bibit001700.xml
Le Lettere
Una dedica (premessa alla Vaiasseide di Cortese) e cinque lettere, due in versi e tre in prosa.
A LO RE DE LI VIENTE
Avenno lo segnore Giulio Cesare Cortese, dapo’ d’avere quarche vota ‘nzoperato da li studi toscanise e de chiù funnamiente, pe pigliarese quarche ricrio, repuoso e stennecchiamiento compuosto ‘no poemma arroico a laude de le vaiasse de Napole, e dapo’ d’averence co ‘no granne stimmolo e sprommiento penzeniato la notte e lo iuorno, avennolo a gran merzé d’Apollo scomputo, aveva fatto penziero de dedecarelo a quarcuno che no le fosse scanoscente commo a li qualisse, che non tanto priesto l’haie ‘norato co li scartacce tuoie, che quanno t’affrontano fanno nfenta de non te canoscere. Io mo, perché le songo tanto affrezzionato, le disse: – Vi’ ca faie ciento arrure, frate mio, a scervellarete pe le gente de ‘sto munno, ca tu porrisse dedecare l’opere toie a lo prevete Ianne, ca ‘nce pierde la rasa;
http://www.bibliotecaitaliana.it/xtf/view?docId=bibit001028/bibit001028.xml
EGROCA SETTIMA
POLIMNIA overo LO VIECCHIO ’NNAMMORATO
Millo, Pizo, Ambruoso
MIL.
Dimme lo vero, o Ambruoso,
e pagate ’na meza,
è lo vero ca spanteche pe Zeza?
AM.
Amore e rogna non se pò nasconnere,
perzò non te lo nego e te l’azzetto,
ca pe ’ssa cana me ne vao ’m brodetto.
PIZ.
Ed essa te responne?
E truove cagno e scagno?
Hai de ’st’amore tuo quacche guadagno?
AM.
Volesselo lo Cielo
che ’sta canazza perra,
’sta nata ’n Varvaria,
fosse piatosa de la pena mia,
né s’avesse la torca renegata
puosto la pezza a l’uecchie,
lo mafaro a l’arecchia,
che non vede né sente
comm’è fatta ’sta vocca ’na carcara,
comme so’ fatto ’st’uecchie doi fontane,
comme ’st’arma è speruta e arricignata,
penzanno a chella cera de ’na Fata!
MIL.
E tu che te ne vide,
bello pierde–iornata,
fravecare a lo viento,
si ’nce pierde lo tiempo,
pierde l’ueglio e lo suenno,
e sospire ’m vacanto, e chiagne ’m pierdeto?
Non vide e non t’aduone
ca mine l’ova pente
de li designe tuffe a ’no pepierno?
iette le campanelle
de le speranze toie ’ncoppa ’na preta?
fraveche le castella
de le chimere toie ’ncoppa le nuvole?
Lassa ’sta ’mpresa, lassa!
essa se fa da largo, e tu t’arrassa.
AM.
Sempre l’ammore, o figlio,
non vole né compagne né conziglio.
Io so’ trasuto ’m ballo,
aggio puesto lo pede a la tagliola,
so’ passato a lo rollo
de le squatre d’Ammore:
mo si lassasse ’nce iarria lo ’nore.
Perzò si be’ ’sta mora
quanno io parlo essa sisca,
e me face l’aurecchie de mercante,
io non faraggio mai chilleto arreto.
So’ proprio resoluto
de vencere o morire;
tanto scavo ’sto fuosso
pe fi’ che ’nce trovo acqua;
tanto do cuorpo a ’st’arvolo,
pe fi’ che cada a terra;
tanto adacquo ’sta preta,
pe fi’ che se scatozza.
«Lo tentare non noce:
senza l’amaro non se prova doce».
PIZ.
Chessa è ’na dura ’mpresa,
ca pe quanto me siscano l’arecchie
de ’no farcone hai l’arma ’ncrapicciata
che vo’ la carne fresca e non salata.
AM.
Vuoi la burla, hai buon tiempo
frate, si non te chiove;
s’essa ha ’nciegno, m’azzetta e la ’nnevina,
ca starà cierto meglio de regina.
MIL.
Regina senza scetro.
AM.
Faria lo buono iuorno.
PIZ.
Faria la mala notte.
cordiale saluto