’A Luna
Poesia
di
Achille Serrao
Cu a capa aizata
pecché hanno a essere liéggie
e penziére, aret’ê ccose che na vota
nce secutavano… accussì accummencia a jurnata
janca na petaccèlla e bannèra
o scennere e o ssaglì n’addore d’acqua
venuto a chisaddò. Partèttemo pecchésto
aret’ê ccose cu’ nu traìno sbalestrato
cantanno a vocca nchiusa comm’a ddinto
ê ccanzone ca schiattano ncuorpo
pàtemo nnante e ll’ate ‘e nuje arreto
smiccianno a strata e chiù ddoppo
a chieia d’’o sole o scuorno
d’’o sole e o pedecìno
addò’ nu muschiglione sesca a nonna
e nisciuno… Tanno dicette pàtemo Arrevammo
nni llà e mmustaje a luna.