Salvatore Argenziano – Verde Prato- Tratteniemiento secunno de la iornata secunna – Lo Cunto de li Cunti – Di Giambattista Basile – vesuvioweb 2023

Inserito da: · Ottobre 22, 2023

Verde Prato- Tratteniemiento secunno de la iornata secunna – Lo Cunto de li Cunti –

Di

Giambattista Basile

A cura di Salvatore Argenziano

… Lo re co’ n’allegrezza granne la fece trasire a la cammara de lo figlio, dove fattole na bona ontata de chillo grasso, ’n ditto ’n fatto comm’avesse iettato l’acqua ’ncoppa lo fuoco, subeto se chiudettero le ferute e deventaie sano comme no pesce. La qualmente cosa vedenno, lo re disse a lo figlio: “Chesta bona femmena meretarria la remonerazione prommessa pe lo banno” e che se la pigliasse pe mogliere. Lo prencepe, sentenno chesto, respose: “Da mo se pò pigliare lo palicco, ca non aggio ’n cuorpo quarche despenza de core, che ne pozza dare a tante: già lo mio è ’ncaparrato
ed autra femmena n’è patrona”.

***Ontata. Unzione. ***Pigliare lo palicco. Restare a bocca asciutta.
***Ncaparrato. Impegnato. Da -caparra-.

Nella, che sentette chesto, respose: “Non te deverrisse allecordare de chella ch’è stata causa de tutto lo male tuio!”. “Lo male me l’hanno fatto le sore”, leprecaie lo prencepe, “e esse ne devono cacare la penetenzia!”. “Tanto che le vuoi propio bene?”, tornaie a dicere Nella. E lo prencepe respose: “Chiù de ste visciole!”. “E cossì”, repigliaie Nella, “abbracciame, strigneme, ca io so’ lo fuoco de sso core!”.

***Visciole. Traslato per occhi.

Ma lo prencepe, vedennola cossì tenta la faccie, respose: “Chiù priesto sarrai lo carvone, che lo fuoco! perzò arrassate, che non me tigne!”. Ma Nella, vedenno ca no la conosceva, fattose venire no vacile d’acqua fresca, se lavai la facce e, levatose chella nuvola de folinia, se mostrai lo sole, che canosciuta da lo prencepe la strenze comme a purpo e pigliatosella pe mogliere fece fravecare drinto no focolaro le sore, perché porgassero comme a sangozuca drinto le cenere lo sango corrutto de la ’midia, facenno vero lo mutto: nullo male fu mai senza castico

***Arrassate. Allontanati. ***Folinia. Fuliggine. ***Porgassero Spurgassero.

Salvatore Argenziano – Verde Prato- Tratteniemiento secunno de la iornata secunna – Lo Cunto de li Cunti – Di Giambattista Basile – vesuvioweb 2023

 

Questo articolo si trova in: ----- Giambattista Basile, 00 In Rilievo

Discussione2 Comments

  1. Alberto Mirabella ha detto:

    Che grandiosità questo racconto di Basile soprattutto per i termini di lingua napoletana puntualmente chiariti.
    Complimenti caro Salvatore e saluti affettuosi
    Alberto

Aggiungi un commento

viagra online italia comprare cialis originale